Kikboksierët kosovarë prezantuan Kosovën denjësisht

Bordi i Federatës së Kikboksit të Kosovës pas kthimit të përfaqësueses kosovare nga pjesëmarrja në turneun ndërkombëtar dy ditor ( 13-15 korrik), në Ankara të Turqisë, mbajti një konferencë me media, duke prezantuar të arriturat e kikboksierëve kosovarë në këtë turne.
Me këtë rast, kryetari i Federatës së Kikboksit të Kosovës, Fatmir Makolli, në emër të kësaj federate fillimisht felenderoi Federaten Turke të Kikboksit për ftesën e bërë dhe për heqjen e shpenzimeve të udhëtimit si dhe ato të qëndrimit të përfaqësueses kosovare atje. Në këtë falenderim hyn edhe angazhimi i organizatës turke TIK-a e cila vepron në Kosovë, e cila njëherit ishte si ndërmjetësuese për pjesëmarrjen e kikboksierëve kosovarë në këtë turne. Kreu i kësaj federate me këtë rast falenderoi edhe Departamentin e Sportit, përkatësisht Ministrinë e Kulturës, Sportit dhe Çështjeve jo Rezidente, lidhur me pagesën e shpenzimeve për sportistët e kësaj përfaqësuesje për të mbajtur ushtrimet e duhura, para udhëtimit për në Ankara. Përfaqësuesja e Kosovës në këtë turne u paraqit me 5 garues dhe u tregua mjaft suksesshme, duke i sjellë në Kosovë 4 medalje: një të artë, një të argjendtë dhe dy të bronzta.
Ndërkohë përzgjedhësi i Përfaqësueses së Kosovës, Fatmir Sopi, theksoi: “Prezantimi i përfaqësueses së Kosovës ishte në nivelin e duhur, mirëpo që Kosova të prezantohet me denjësisht në Kampionatin botëror të kikboksit, i cili do të mbahet në muajin e ardhshëm në Gjermani duhet punuar me intensitet dhe me një përkushtim më të madh”. Sipas Sopit rezultatet e arritura janë mjaft të vlefshme për këtë sport. Përfaqësuesi i Departamentit të Sportit, Xhafer Murtezaj i cili ishte pjesëmarrës në këtë konferencë pohoi: ”Ndihem i kënaqur që jam në mesin tuaj, në mesin e një përfaqësuese e cila denjësisht e ka prazantuar Kosovën në këtë turn endërkombëtar”