Dunga i lumtur për suksesin e Brazilit

Fitorja ndaj Argjentinës në finalen e Kupës së Amerikës, e ka bërë tejet të lumtur përzgjedhësin e Brazilit, Karlos Dunga. "Vendi im është i lumtur, ngase futbollit brazilian ia kemi rikthyer respektin", ka thënë Dunga.
Edhe pse puna e tij dhe përbërja me të cilën ka udhëtuar në Venezuelë është kritikuar ashpër, Dunga nuk ka dashur që ta shfrytëzojë triumfin për t'iu kundërpërgjigjur kritikëve. "Ajo që kemi bërë ne është e thjeshtë - kemi luajtur futboll, kemi ditur edhe të sulmojmë edhe të mbrohemi dhe në mënyrën më të mirë kemi shfrytëzuar talentin, të cilin e zotërojnë këta djelmosha, e që është shumë më i madh se sa mendojnë disa të tjerë", ka nënvizuar Dunga.