Gabim Reali, 80 milionë euro për Kaka

Madrid, 22 qershor - Skuadra kampione e Spanjës, Real i Madridit, në afatin kalimtar ka hyrë me buxhetin prej 110 milionë euro,
ndërsa pjesa më e madhe e kësaj shume, 80 milionë euro, sipas së gjitha gjasave do të shfrytëzohet për angazhimin e yllit brazilian, mesfushorit të Milanit, kaka, shkruan e përditshmja spanjolle “AS”. Varësisht nga realizimi apo jo i këtij transferimi, zyrtarët e “klubit mbretëror” i kanë përgatitur dy plane. Nëse arrihet transferimi i magjistarit brazilian, atëherë shpenzimet e tjera do të jenë minimale dhe parashikohet të angazhohen Havier Saviola, Gabriel Haince, Klod Makelele, Jirzhi Dudek dhe ndonjë futbollist tjetër. Ndërkaq, nëse Silvio Berluskoni nuk lëshon pe në shitjen e brazilianit, atëherë Reali ka menduar të përforcohet me katër futbollistë cilësorë dhe aty përmenden Daniel Alvesh i Sevilës, Arjen Roben i Çelzit dhe Çesk Fabregas i Arsenalit. Dilema se cili plan do të zbatohet pritet të zgjidhet në javën e ardhshme pas takimit në mes zyrtarëve të Realit dhe Milanit. Berluskoni nuk ka treguar disponim për ta shitur brazilianin, por oferta prej 80 milionëve mund të ndryshojë mendimin e “rosonerëve”. Gjatë ditëve të ardhshme, sipas “AS”, Reali do të ndahet me Fabio Kapellon dhe do të nënshkruajë me Bernd Shusterin, i cili disa herë ka thënë se me çdo kusht e dëshiron mesfushorin e Milanit, duke thënë se ai është më i vlefshëm se Kristiano Ronaldo.