Brazili fitues i Kupës së Amerikës

Ndonëse shumica e ekspertëve dhe dashamirët e futbollit e kishin llogaritur Brazilin autsajder në finalen e 42-të të Kupës së Amerikës, të përzgjedhurit e Karlos Dungës arritën ta mbrojnë këtë trofe, duke e mposhtur rivalin e përbetuar, Argjentinën, me rezultat bindës 3:0.
Brazili arriti deri te titulli i tetë i kontinentit të Amerikës Latine, me një lojë të shkëlqyeshme dhe të disiplinuar, me golat e shënuar nga Baptista, në minutën e 4-të, Ajala (autogol) në minutën e 40-të dhe Dani Alvesh, në minutën e 68-të. Brazili luajti në këtë aktivitet pa yjet e saj kryesore si: Kaka, Ronaldinjo, Adriano, Ronaldo, Lusio, Roberto Karlos dhe Sisinjo, por kjo nuk e pengoi që ta fitojë këtë trofe. Në anën tjetër, Argjentina, e cila në këtë aktivitet u paraqit me përbërjen e saj më të mirë, në finale paraqiti lojën më të dobët gjatë këtij kampionati. Ndërkohë vendi i tretë në Kupën e Amerikës i ka takuar Meksikës, që ka mposhtur Uruguain, 3:1.