Futboll: Bekami i penduar që braktisi Realin

Dejvid Bekami duket se është penduar që u largua nga Reali i Madridit dhe nënshkroi kontratë me skuadrën amerikane, Los Anxhelos Galaksi.
Një gjë të tillë e ka pohuar vetë ylli anglez. “Do të dëshiroja të qëndroja më gjatë te Reali i Madridit. Mund të kisha luajtur edhe tri edicione tjera në nivelin më të lartë, por mora vendim për t'u larguar, pasi drejtuesit e klubit më thanë se nuk do ta zgjasnin kontratën me mua", ka pohuar Bekami. Ai ka thënë se është penduar për vendimin e marrë në mbrëmjen kur Reali u shpall kampion i Spanjës. “Ajo mbrëmje ishte festive për të gjithë, por unë njëkohësisht isha edhe i zhgënjyer për vendimin e marrë. Megjithatë, tashmë gjithçka është mbyllur sa i përket kësaj çështje. Do të jap maksimumin tim tek skuadra ime e re, kurse Realin do të vazhdoj ta mbështes moralisht dhe do t'i ndjek lojërat që do t'i zhvillojë”.